Неміс WIKA компаниясы Атырауда зауыт ашты
«KAZAKH INVEST» ҰК» АҚ қолдауымен WIKA Атырауда жаңа өндіріс орнын ашты. Зауыт Орталық Азия мен Кавказ аймағы елдеріне өнім жеткізетін болады. Жоба командасы алты айдың ішінде өндірістік желілерді жобалап, орнатып, іске қосты, бұл WIKA тарихындағы жобаның ең жылдам аяқталу уақытының бірі. Жобаның құны 1 миллион еуроны құрады.
Атыраудағы зауыт манометрлер, диафрагмалық тығыздағыштар мен температураны өлшейтін электронды аспаптар шығарады. Барлық өнімдер жоғары талаптарға сәйкес жоғары дәлдіктегі калибрлеу зертханасында сыналады және тексеріледі. Өнімдерді қолданудың негізгі сегменттері аймақтағы мұнай-газ, энергетика, химия, мұнай-химия және тау-кен өнеркәсібі болады.
Ашылу салтанатына EMEAI аймағындағы сату жөніндегі атқарушы вице-президенті Андреас Кейгер, ТМД өңірі бойынша аға вице-президенті Энвер Шульгин, KAZAKH INVEST өңірлік өкілі Ержан Көлбаев және жүзге жуық клиенттер, іскер серіктестер мен үкімет өкілдері қатысты.
«Атырау қаласындағы бұл жаңа кәсіпорын бүкіл әлем бойынша біздің қатысуымызды кеңейту жобасы. Оны құрудағы басты мақсатымыз – Қазақстан, Өзбекстан, Түркіменстан, Тәжікстан, Моңғолия, Әзірбайжан сияқты Орталық Азия елдеріндегі өсіп келе жатқан сұранысты қанағаттандыру. Зауыттың орналасуы біздің экспорттық мүмкіндіктерімізді кеңейтіп, жергілікті жеткізушілермен және өндірушілермен жұмыс істеуге деген ұмтылысты одан әрі күшейтеді. Бұл өз кезегінде жергілікті өндірісті арттырып, логистикалық шығындарды айтарлықтай азайтады. Біздің компания өлшеу құралдарының жергілікті өндірісінің стандартын белгілейтін болады», - деді Андреас Кейгер.
Энвер Шульгин компанияның Атыраудағы Мұнай және газ университетімен теориялық білімді практикалық біліммен ұштастыратын ынтымақтастығын атап өтті. Студенттер метрология саласындағы нақты өндірістік процестер мен озық тәжірибелер туралы білуге, сондай-ақ халықаралық компаниядағы еңбек жағдайларымен танысуға мүмкіндік алады.
«Бүгін Атырауда өндірісті іске қосу арқылы WIKA алғашқы қадам жасауда, бірақ Қазақстанда алдағы жылдары өндірісті дамыту және ұлғайту жөніндегі жоспарлары бар», - деп атап өтті Энвер Шульгин.
Анықтама:
11 200 қызметкері бар WIKA тобы қысым мен температураны өлшеуде әлемдік көшбасшы болып табылады және деңгей, күш және ағынды өлшеу, сондай-ақ калибрлеу технологиясы бойынша стандарттарды белгілейді. Дәл өнімдердің, шешімдердің және қызметтердің кең портфолиосы отбасылық бизнесті күшті және сенімді серіктес етеді.
